Тропари, кондаки на 8.09.18

Тропарь мучеников Адриана и Наталии глас 4 Мученицы Твои, Господи,/ во страданиих своих венцы прияша нетленныя от Тебе, Бога нашего,/ имуще бо крепость Твою,/ мучителей низложиша,/ сокрушиша и демонов немощныя дерзости./ Тех молитвами// спаси души наша.

Ин тропарь мученика Адриана глас 3 Богатство неиждивущее вменил еси/ веру спасенную, треблаженне,/ оставль отеческое нечестие/ и Владыки стопами шествуя,/ Божественными даровании обогатился еси,/ Адриане славне;/ Христа Бога моли/ спастися душам нашим.

Кондак мучеников Адриана и Наталии глас 4 Жены Богомудрыя Божественная словеса в сердце положив,/ Адриане, мучениче Христов, к мучением усердно устремился еси,/ с супругою венец приемь.

Кондак мучеников Адриана и Наталии глас 4 Мученик возсия/ Божественная память/ и земныя озари вся концы светло,/ с веселием зовущих:// Ты еси мучеников, Христе, радование.

Тропарь Божией Матери пред иконой Ее Владимирская глас 4 Днесь светло красуется славнейший град Москва,/ яко зарю солнечную, восприемши, Владычице,/ чудотворную Твою икону,/ к нейже ныне мы притекающе и молящеся Тебе, взываем сице:/ о пречудная Владычице Богородице!/ Молися из Тебе воплощенному Христу Богу нашему,/ да избавит град сей и вся грады и страны христианския/ невредимы от всех навет вражиих// и спасет души наша, яко Милосерд.

Кондак Божией Матери пред иконой Ее Владимирская глас 8 Взбранной Воеводе победительная,/ яко избавльшеся от злых/ пришествием Твоего честнаго образа, Владычице Богородице,/ светло сотворяем празднество сретения Твоего и обычно зовем Ти:// радуйся, Невесто Неневестная.

Ин кондак Божией Матери пред иконой Ее Владимирской глас 8 К Взбранней Воеводе и Заступнице, Деве и Богородице,/ в чистей совести, верою утвердившеся, русстии народи,/ невозвратно надежду имуще, притецем,/ к чудотворному Ей и пречистому образу, и возопием Ей:/ радуйся, Невесто Неневестная